２０１５年。十大年度最愛（上）

最近好少寫每月最愛，事關其實每樣嘢都用好耐～～（同埋，懶）

　

而家集合晒２０１５年一直陪伴住我、一直無限地回購既野。

（排名不分先後！！！）

註：為免有排都上載唔到篇文，我會先講住一半～

２０１５年。第一最愛。

　

Kerastase 逆時光至臻修護髮膜 （購自Look Fantastic $2XX）

　（圖摘自官網）

自從開始用呢隻髮膜，就一直用，除非有次有買唔切。

個排好失落，唔止頭髮，直程係連個人都好無心機。

話說呢隻髮膜唔止令頭髮又軟又滑，仲有一陣好香既香水味。

呢隻味係完全振奮左我成晚，心情都會好返好多。

所以佢唔止係髮膜，仲係一半功能係香水～

２０１５年。第二最愛。

Jo Malone English Pear and Freesia 英國梨與小蒼蘭古龍水（購自專門店，約$10XX 100ml）

講開香味，Jo Malone已經幾年未停過咁買。

最鍾意都係English Pear。無論係買左邊隻新味，都要用呢隻mix埋黎噴！

　　

最近發現香港款式太少，反而係日本韓國款式更多！！

仲要再平Ｄ！！

２０１５年。第三最愛。
　　
Hollister 連身裙
　
近年最鍾意都係Hollister One Piece Dressess
因為我好矮啦，又瘦但又大Pat 喎～　

咁著貼身Ａ字裙就可以遮到Pat、露小小腿、收到腰
特別推介呢條裙！！！

小小性感，但又遮到內衣，條裙又唔太短，最緊要我怕熱～小小露腰又夠晒涼！
買左一次之後，同款又買另一隻色～
最緊要係～兩百蚊一條裙，無可挑剔啦掛？

以下呢幾款我都有買，而家仲可以網購（遲左ＰＯＳＴ文，無晒）

（圖摘自官網）


２０１５年。第四最愛。

Fresh Lip gloss (Cherry)　（購自專門店，約$15X）

呢支係唔見左又就即買；用完又即買！　
係呀，Lip Gloss 都有用完的一日，你就知我幾愛佢（心心眼）
　
呢隻Lip Gloss 有一半成份係潤唇，一半就係唇彩～
所以用落唔乾又唔立～（無限心心眼）
　
你見我可以用淨咁少就知我幾愛佢！！！！！



２０１５年。第五最愛。

Loccitane Lait Parfume Body Milk（購自專門店，約$15X 175ml）

回購左兩次。呢隻有少少Cheating.. 因為年尾先遇上佢～

顧名思義，呢隻Body Milk 有香水味，可以持續兩至三小時香味
（拿～如果Sales話可以全日都有香味呢，你就當笑話咁聽啦～）

最重要係清爽唔油膩，香而不俗～同埋保濕程度算中上～
冬天用佢都唔會覺得太亁唔夠潤～

誠意推介～

最最最後，可能大家見咁多嘢之前都見過～好悶咁～
但其實，一年最愛，梗係來來去去都係佢～啦～
但全部都係真心分享～　

聲明 : 以上產品全為自購，所有評價純粹個人感受，只供參考。產品正確成份及買賣地點以官方網站為準。

小妹IG shop，請多多支持～
Instagram: @mvlonlineshop
Facebook: @mvlonlineshop　

我的爆牙。脫牙。種牙。牙套驚魂（下）

終於捨得寫埋下半集。。。（笑）
　　
回顧返爆牙、揾牙醫、整牙同鑲牙套，足足搞左成一個半月。
到我而家牙套都鑲好晒，心情好返好多，輕輕鬆鬆咁再分享。

問７。咁係咪睇一次牙醫就搞掂？
答７。由於隻牙之前係杜晒牙根，所以呢次只可以計鑲牙套的時間。
　　　呢次分左三次去睇。
　　　第一次：睇牙醫診斷隻牙要點整。決定牙套就磨平裂口、切除多餘牙肉，再套返個臨時牙套。
　　　第二次：睇下牙肉收復成點，鑲條牙柱係中間，再套返個臨時牙套。（大概半個鐘）
　　　第三次：等牙套訂購返黎之後，直接套上牙套。（五分鐘內完成）
　
備註：杜牙根至少分兩至三次先杜得清。價錢大概都四千至五千～
　　

問８。其實最想知係。。究竟比左幾多錢？
答８。呢次係鑲大牙牙套，約＄４７００，連埋診症價錢，分三次診症俾錢。記住係俾現金～
　　　後來同朋友格返價。我呢個價算係中上價錢，偏貴。
　　　不過，鑲牙套都好睇材料質素～所以好depends黎自大陸料定歐洲料
　　　調景嶺超好心地牙醫就話呢隻係外國訂造（唔記得瑞士定咩歐洲訂返黎之類），絶對係靚料！
　　　臨鑲牙套前，俾我睇清楚成隻牙套～仲話啱啱新鮮訂返黎，即場開封（再笑～）
　　

問９。咁其實大陸料同歐洲料有咩分別先？（除左價錢之外）
答９。WELL～我可以好肯定咁講，如果你用大陸牙套，我估唔用得十年之內～至少你好快想換過隻！
　　　因為其實我有其他牙都有鑲牙套。牙醫無講係黎自邊到製造，但用耐左，顏色係好易暗左～
　　　我唔識點講，但同樣價錢，你好明顯知道係差的質地～而且內裡的材料係黑色底～

　　
問１０。之前你有講過種牙。咁其實種牙同鑲牙套有咩分別先？
答１０。好肯定，種牙會貴過鑲牙套～同埋，種牙即係會將你本身的牙脫走。
　　　　如果你超過四十／五十歲，咁無左隻牙對你地黎講唔係好大件事，咁其實你大可以脫左去。
　　　　講真，我自己認為啦。廿幾歲～咁快無左一隻有生命力的牙。你自己決定值唔值得。
　　　　因為一隻種牙，同一隻牙套，維持到的日子其實差唔多。（如果你好好錫排牙～）
　　　　即係種牙（兩萬幾蚊）用到十年，但牙套（五千蚊）同樣都係十年！
　　　　同時，種牙唔係你想像中咁安全，有機會出現排斥～　即牙肉會敏感～
　　　　咁之後又有排整～
　　　　（呢Ｄ係牙醫建議～大家真係可以問清楚牙醫）
　　　
問１１。你做完幾耐？而家覺得點？有無野要戒口架？
答１１。第一日鑲完牙套，其實好唔慣。好似有隻假牙係入面。
　　　　而家做完兩個月左右，習慣左呢隻牙套！！！！不過要好好保養～
　　　　牙醫講過，唔可以食太凍、太硬的食物～咁樣隻牙套可以保持用到十年內～
　　

問１２。其實做完咁耐，有無野可以建議大家？
答１２。早晚刷牙！比心機刷！！因為整牙真係好貴！！！


如果大家有任何疑問，歡迎留言～或者電郵至 beautymellee@gmail.com
暫時未必諗到咁多Ｑ＆Ａ係呢度。但希望以上經驗幫到大家～唔好行多餘的路！！！！


小妹IG shop，請多多支持～
Instagram: @mvlonlineshop
Facebook: @mvlonlineshop　

每月分享。一月*二月*三月。分享文

超耐無寫分享文～～～（最近工作較忙，同埋忙住去旅行。。笑）

而且最近多左去旅行，好多突如其來的事想分享（例如過期護照，零下廿幾度又點算咁！）

但每次打到一半就忙住其他野，結果有好多文係ｄｒａｆｔ左係度～～（非廣告文！！）

癈話少講！！！！即刻分享～！！

——————————————————————————————

１. 雪花秀滋陰水 Sulwhasoo Balancing Essential Water 125ml （購自sogo thankful week, 約$400）

　賣點：以具舒緩功效的枸杞，配合有效補濕的馬齒莧，令肌膚瞬間注滿水分滋養。（摘自官網）
　效果：本身一至兩年前購入。未踏入中女年紀、又係夏天，會覺得超！級！立！
　　　　大概前幾個月開始覺得搽乜野都好乾時，諗起有佢，就開始用。
　　　　之後就～不～～得～～～～了！！！！　（台。灣。腔）
　　　　皮膚係完全感到好水潤。如果而家轉季，直頭係唔使再搽其他精華同面霜！
　　　　同時，用左一個半月左右，虎紋係好明顯有少少咁多減淡
　　　　（我係勁懶無做ｆａｃｉａｌ同無飲膠原蛋白勁耐都有呢個效果，算唔錯啦）
　　　　我係超級滿意個效果！！（心。心。眼。）
　評分：10/10 （等待sogo thankful或者去韓國入貨）

２. 1028遮瑕膏 （購自台灣watsons, 約$100）

　賣點：同時提供調色霜及遮瑕膏
　效果：救命呀！一百蚊又遮到萬年黑眼圈呀！！！！！
　　　　話說我用開ＩＰＳＡ三色遮瑕膏，不過唔使兩三個鐘又要補妝。
　　　　但１０２８就絶對唔使！！效果持續五至六小時！！
　　　　用左邊調色霜減淡眼眼圈，再用右邊遮瑕膏遮埋重災區！
　　　　遮完個黑眼圈，我覺得自己成個樣唔同左，同整容一樣！！！！！！
　　　　（一開始唔覺乾，但四五個鐘後就會出乾紋）
　　　　不過無掃，有時想補返妝會好唔方便，所以我會隨身有支棉花棒！
　評分：9/10 （我比較後悔自己無入貨自己賣！！！！）
　　
３. 轉轉（？）３２ＭＭ捲髮器（朋友GMarket代購，約$300）

（網上取圖, 自tvb4life.pixnet.net）

　賣點：可捲直、捲曲，不易傷頭；獨特梳頭，捲髮時可令頭髮更順滑、更貼服
　效果：一開始係貪平、同朋友夾單唔使自己搞先會買；之後先發覺原來係老翻（苦笑）
　　　　正常捲曲、捲直都無問題，但好易會過熱（有幾次已經灼傷手臂同耳仔><）
　　　　梳頭有時會捲走其他頭髮，搞到好易打結
　評分：6/10 （以呢個價錢，用左一兩年都未壞，算好抵，但太唔安全啦）

Remark: 有雜誌報導過IG Shop賣假嘢，記者及專家都測試認為有安全性問題。
文章連結 >>> 投訴冒牌「鑽轉」捲髮器熱賣 電流不穩

４. Loccitane Lait Parfume Body Milk 175ml （購自專門店，特價約$15X）

　賣點：含有香水味成份的身體乳液。
　　　　［蘊含突尼西亞橙花精華油及馬達加斯加白洋蘭原精。
　　　　滋潤的配方富含乳木果油及甘油。發揮滋養及保濕功效，並留下柔和的香氣］（摘自官方網站）
　效果：呢款係ＢＡ推介我用，聞聞下又真係幾香。買完返公司，同事以為我買左新香水
　　　　係淡淡的果香味～好甜的味～香味好持久，大概可以維持半日～
　　　　但最緊要係夠保濕，又唔立（已經儲左幾支貨係屋企。因為最近有特價）
　　　　之前用開玫瑰味，但對比之下，覺得呢款保濕、滋潤好多～
　評分：10/10 （回購左幾次啦！！！）

——————————————————————————————


聲明 : 以上產品全為自購，所有評價純粹個人感受，只供參考。產品正確成份及買賣地點以官方網站為準。

小妹IG shop，請多多支持～
Instagram: @mvlonlineshop
Facebook: @mvlonlineshop

Fancl 膠原蛋白 的迷思？

＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

!!更新!!　2016.3.30

飲完左一盒Tense Up 同兩星期膠原蛋白粉。包膠。

話說Tense Up效果真係好好，方便好飲效果快！

之後諗住平平地沖膠原蛋白粉保持效果

點知，至少飲左一至兩星期，先見到Tense Up令皮膚滑一滑的效果

仲要唔太明顯。

之後去日本會狂入Tense Up，會試下兩款隔日飲的效果～

____________________________________________________________

邁入中女年紀，係時候會研究做ＦＡＣＩＡＬ，食營養產品

兩三年前，都會食下膠原蛋白ｊｅｌｌｙ（開ＢＬＯＧ第一篇文已經有寫）

但始終唔夠恒心，因為食營養品要長期食用先最見效。

最近除左沉迷雪花秀，仲沉迷緊Fancl Supplement 

Facnl 除左落妝油、洗面粉我自己係一直用開之外，仲有膠原蛋白同維他命我都開始食緊

Fancl有幾款膠原蛋白補充劑 ，一開始想入手都幾迷茫，不過都有少少心得想分享下

1. Tense up （玻璃樽版。劉心悠狂賣個款） 

2. HTC 膠原蛋白。粉 （日本有售，香港暫未有得買）

3. HTC 膠原蛋白。丸 （香港有得買）

4. 美時。營養。丸 （香港有得買）

其實一開始我都好亂，有太多款，唔知由邊款開始

之後會開始由膠原蛋白含量比較，之後就會比較其他含量

（為左簡單解釋，我都由日本ＦＡＮＣＬ官網睇左營養含量，做個簡單比較）

其實之前都有去過ＦＡＮＣＬ香港門市查詢過以我呢個中女年紀，食乜先好？

咁ＢＡ姐姐梗係ＳＡＬＥ我食最貴既ＴＥＮＳＥ　ＵＰ啦！
（咁我當然又係耳仔軟咁買左）

但比較過之後，就發現ＨＴＣ膠原蛋白粉最抵


１. 較高含量嘅膠原蛋白：2600mg

２. 有維他命Ｃ（幫助膠原蛋白吸收）：100mg

３. 有蘋果多酚（可抗氧化及減少油脂吸收）：10mg

４. 對比其他產品，呢款係最多膠原蛋白含量而又最抵～


食後感：
ＴＥＮＳＥ　ＵＰ

呢款係最方便，又好飲（橙味又香又甜～），但價錢太貴；托返屋企又嫌重～囉～～

不負我荷包既付出，效果係超～快～～！！！！！！
未飲完一盒（１０支裝），大概三四日左右，全身皮膚已經係超～～滑～～～！！！！！
１０支飲完後，毛孔會明顯細左少少（如果有人話零毛孔實呃你！）
上妝唔使講係前所未有咁貼！！

但～呢～虎紋改善就無咁明顯～～


ＨＴＣ膠原蛋白。粉

講真，要溝甜少少既野，先接受到～（溝水仲難飲。。媽呀～～～～～～）

因為係有少少味，唔識點形容。。。（魚膠個種腥味？）

不過呢款係我飲完ＴＥＮＳＥ　ＵＰ先開始飲～

希望ＫＥＥＰ住ＴＥＮＳＥ　ＵＰ個效果～　又唔使咁貴～

留意！沖膠原蛋白粉，不能用熱水，盡量晚飯後飲用！！！
留意！沖膠原蛋白粉，不能用熱水，盡量晚飯後飲用！！！
留意！沖膠原蛋白粉，不能用熱水，盡量晚飯後飲用！！！

（因為很重要，所以要講三次～）　（笑）

因為熱水破壞維他命Ｃ，影響膠原蛋白吸收～

晚上服用亦可幫助吸收膠原蛋白；同時亦因為太多營養，有機會令人好眼訓～



最後，如果經濟ａｆｆｏｒｄ到，我係絶對建議飲ＴＥＮＳＥ　ＵＰ
否則，可以試下兩者隔住黎飲，又平又達到效果～


利申：只有ＨＴＣ膠原蛋白粉於小妹ＩＧ店有售

我的爆牙。脫牙。種牙。牙套驚魂（上）

新一年新開始，祝大家２０１６年過得比上年開心又健康～

最緊要愈來愈靚～

。回歸正題。

２０１５年尾發生左驚人事件。無圖。希望同大家分享下。

話說有晚食食下泰國買返黎既合桃，突然聽到好清脆既"BONG"聲。之後有一細粒合桃咬唔開。

吐返出黎睇睇：白色細細粒（粟米SIZE）硬硬地。

諗住粒合桃好～差～QUALITY。。。不過都算，照食啦。

點知再食既時候，條脷界損左。咬野又好唔舒服。即時拎塊鏡照下排牙。

嘩～！！！！！！！！！！！！！！！！！！！！！！！！！！！！！！！

呀～！！！！！！！！！！！！！！！！！！！！！！！！！！！！！！！

入面有隻大牙無左三分一！！！！！！！


超級驚。完全唔知點算。

原來我咬爆左隻牙。

最後排除萬難，碰上唔少釘，最終揾到個好牙醫幫我整返。

回想返成個爆牙、揾牙醫、決定整牙既過程我都處理得無咁好，

為免大家有日不幸遇上牙齒問題，希望呢次經驗會幫到大家。

以下為本人經驗分享，並非牙醫專業意見；
如有任何問題，請向專業顧問查詢。

問１。如果突然咬爆牙、整甩牙，即時應如何處理？
答１。任何突發意外，因應意外嚴重程度，致電緊急求助熱線９９９或去急証室求助。
　　　（OK!! 我明大家諗乜，甩牙都打９９９？玩野咩？）
　　　（因為事發當晩已經係夜深，仲要係公眾假期。晚上無牙醫開診。）
　　　（如果大家好擔心，的確可以去急証室求助，醫生可以轉介夜診牙醫檢查。）
　　　（因為咁啱我隻牙的確無特別事，否則，延遲檢查或整理其實好大件事。）
　　　
問２。咁當晚我係無揾到牙醫，下一日早上又可以點算。。。？
答２。事發後一日早上，我即時致電多位牙醫，向佢地講清楚情況，話明係急診，
　　　希望牙醫可抽少少時間即日檢查。
　　　（大家留意，正常牙醫每日檔期應該排得好密。根本無時間攝時間見急診。）
　　　（所以，牙醫肯見即日急診真係萬幸；同時，唔好預佢幫你即刻整理隻牙。）
　　　（咁當然有部份牙醫會盡量抽時間幫你整埋。）
　　
問３。究竟你隻牙咩事？
答３。原來咬爆左個隻牙係之前杜左牙根，但未鑲牙套。
　　　因為杜左牙根既牙其實好脆弱。如果咬較硬的食物，好易令此牙齒碎裂。
　　
問４。喂，杜牙根，即係咩？
答４。杜牙根，專業名稱即是牙髓治療。
　　　牙髓治療是把部分或全部受感染或壞死的牙髓組織清除，然後把牙髓填封。
　　　目的是為清除牙髓腔的細菌，阻止牙髓感染蔓延至牙周組織和牙槽骨，
　　　以免這些組織受破壞，使牙齒得以保存。
　　　（即係通常蛀牙太嚴重或太深，蛀到入牙齒深處及神經，令你感到牙痛；
　　　　最後要清除牙齒內大部份組織及神經，咁就令你無咁痛。）
　　　（牙齒入面既野無晒，得返個殼；如果太用力咬硬物，會好易整碎呢隻牙。）
　　　（資料來源：http://www.toothclub.gov.hk/chi/adu_01_06_08.html）
　　　（可參考報章：http://the-sun.on.cc/cnt/lifestyle/20130417/00484_002.html）
　　
問５。咁最後牙醫建議點處理？
答５。首先，真心建議各位，如果有突發或嚴重意外，真係需要向多位專業顧問尋求意見。

　　　第一位牙醫，係西環著名牙醫。（之前我睇過幾次，感覺係真心對待病人。）
　　　首先，助護安排到即日急診比我見牙醫檢查。但係！！係我工作時間內。
　　　。。提下大家，牙醫正常情況係出唔到假紙，只能出應診紙。。
　　　有問助護可否轉較夜時段（其實只係遲半個鐘左右），咁我唔使請假。但助護堅持唔肯。
　　　之後我當然照睇並準時到達。可惜我一直等，等足一個半小時（你無睇錯，係９０分鐘）
　　　甚至，比我約較後時間的病人，都已經見左牙醫。。我再多次向助護了解希望佢地跟進。
　　　之後開始應診，牙醫睇左隻牙一陣，開始講返情況。
　　　（以下對話為真實情況）
　　　牙醫：建議你成隻牙脫左去。其他牙醫可能會叫你鑲牙套，但鑲完係唔用得耐。
　　　　　　脫左會簡單Ｄ。又平Ｄ。七百蚊。
　　　我　：咁脫左之後點算？
　　　牙醫：呢層你唔使諗住，脫左先。因為你隻牙有問題，情況較急。
　　　我　：下？但脫左就得返個窿。咁點食野？
　　　牙醫：其實咁，之後可以再安排，可能種牙。但暫時唔使諗呢D野住。
　　　　　　因為你已經過左鑲牙套最黃金的時間。呢刻最重要係處理而家隻牙點算。
　　　我　：唔。。
　　　牙醫：點？如果要脫牙可以即刻做埋去，好快姐。
　　　我　：我諗下先。。。
　　　牙醫：無問題！你可以諗諗。但整牙套就真係晒錢，無乜用。

　　　（以上內容我唔加任何主觀意見。希望大家幻想同體會到當時我既感受）
　　　（提返。呢次檢查牙醫無向我收取任何費用，同時我都拎左應診紙先。）
　　　
問６。咁結果呢？揾返西環牙醫？定揾其他醫生？
答６。因為太心急，再之後一日（即爆牙後兩日），早上求其預約左一個牙醫再睇過。
　　　諗住再請病假再睇。
　　　　　　　
　　　幸好。被朋友制止左。
　　　　　　　　
　　　同日。聽朋友介紹，去左揾調景領著名牙醫。（女仔去會俾毛公仔你攬住睇牙個個牙醫）
　　　當晚放工後即刻到診所。牙醫會先詳細檢查每隻牙。之後開始講啦。
　　　（以下都係真實情況）
　　　牙醫：哦。好小事。唔使驚。鑲返牙套得啦。
　　　我　：下？真係？。。。但有牙醫叫我脫左去，唔好做牙套喎。
　　　牙醫：（笑）邊個衰公叫你咁做呀？
　　　我　：唔。。。。。。。西環好出名個個牙醫
　　　牙醫：姓何既？但你揾左佢就唔會我啦。
　　　我　：唔係呀。。。唔開名啦，但係姓何附近個位啦。。。
　　　牙醫：（大笑）好啦
　　　　
　　　（最後我決定鑲牙套。）

－－－－－－－－－－。未。完。待。續。－－－－－－－－－－－－－