聲波洗面機。Clarisonic Mia 2。分享購買前及使用後心得。

用左Clarisonic Mia 2已經半年有多，仲要係日日用個隻，應該都夠資格講下心得啦掛。(偷笑中...)

購買前的迷思....

1. 幾時買 ? 邊到買 ? 幾多錢 ? 
   2013年12月尾，IFC Lane crawford (IFC 少強國人，BA先得閒理你)。個陣買係HKD 13XX
   
   (截止2014年8月，Clarisonic官網標價$1400)
                                                                                                                                                      
2. 點解去專門店買? 水貨平幾舊水喎!!?
   朋友係水貨店買Mia 1 (HKD9XX, 早我半年買)，有一次保養，但要寄部機返美國搞。
   我爬過文，有D網友話美國個邊唔認有得咁整水貨。(係真係假就唔知)
   即係咁，部野千幾蚊，壞左又無得整都幾肉赤，自問經常整爛野，個三百幾蚊換兩年保養，識計數既你應該覺得值得掛?
                                                                                                                                                           
3. 個陣有Mia 1, Mia 2, Plus, Aria 呢四款，點解唔買最新款? 又唔買PLUS(清潔全身個款)?
   Mia 1: 個款太舊，得一個速度，如果唔啱FEEL就晒錢
   Aria  :  最新款又輕D同再貴D；三個轉速，好似用唔著；USB充電就晒鬼氣，我有幾可去旅行/ 公幹；
   Plus  : well... 身體磨沙就乖乖地留比身體磨膏做啦；仲有，支野咁重，揸住震足三分鐘，身為LADY既你地，根本無法忍受沖涼好似做緊GYM咁辛苦。
   所以，論功能、價錢，最後我買左MIA2。唔算太新太舊，轉速有快有慢，啱晒有時爆瘡既我。
                                                                                                                                                    
4. 點解要買Clarisonic ? 仲有OLAY, Neutrogena, PoBling ........... (下刪幾千個牌子)
   第一. 個陣好出名；講得出的洗面機，大部份都係抄佢功能，咁點解要買雜嘜唔買本身出名個款?
   第二. 2013年12月尾，飽受暗瘡之苦，無論幾早訓幾努力保濕，D暗瘡謝晒好快又會生返
   第三. 我係考慮左至少半年時間，同時見証住朋友皮膚好轉左，又睇晒網上comment，個陣又afford得起，所以先買。
                                                                                                                                                         

用左半年後....

1. 老老實實，暗瘡、黑頭、暗粒係咪無晒先!?
   話無晒個個肯定呃你。
   暗瘡，我肯定係少左好多。當時我左臉右臉額頭下巴都會爆幾粒，而家每個方位只會爆一兩粒，雖則我近排左臉狂爆瘡... (利申，夜訓麥記辣野一直長伴著我)
   黑頭，一樣咁多
   暗粒，本身好少有，唔覺有多有少過。
                                                                                                                                                         
2. 網上話用完會爆暗瘡、敏感，咁你有無先 ?
   第一個月，我係狂爆暗瘡，比之前爆得更厲害。第二個月開始爆少左，到第三個月再少D D，最好係第四、五個月，完全無瘡 。隨後幾個月都會爆幾粒瘡，但好快會謝。
   有另一位朋友係我介紹下都有買呢部機，但因為佢係極敏感肌，用左兩日就狂爆瘡兼敏感，最後當然退錢啦。(呢位朋友係專門店買，所以先有得退，水貨鋪有無得退就唔知)
   
   (截自官網，部機有問題，30日內可以refund。係退錢! 唔係換款)
   所以，洗面機唔係人人都啱用，詳情睇以下條新聞:

   濕疹暗瘡　忌「洗面神器」

   
   http://hk.apple.nextmedia.com/news/art/20140508/18713016
                                                                                                                                                       
3. 係咪要成日換刷頭 ? 一個刷頭用幾耐 ? 要幾多錢 ?
   BA話三個月換一次；我就見到D刷毛殘晒，先會即刻換；通常四至五個月就殘啦。
   (利申 : 我只會夜晚先用)
   可以單買或者買一盒兩個同款的刷頭。(都係專門店買，我怕買到假野)
   
   (截自官網；跟機係敏感刷頭，用左三個月我買左細緻刷頭，呢款無咁吉面，舒服好多)
                                                                                                                                                         
4. 講咁耐，如果部洗面機壞左又過左保養，你會唔會再買返Clarisonic呢 ?
   um... 講真，洗面機真係一件好EXTRA的野，如果個陣又有閒錢我先會買。
   同埋一年換三、四個刷，咁呢部野就變左長期消費，真係好come計。
   (事關我又見到新玩具，Foreo Luna!!! 都係千幾蚊，但唔使換刷!!! 如果Clarisonic壞左，我好想買呢部XDD)
   
   (圖片截自look fantastic；都係包兩年保養)

最後，始終呢部洗面機都好貴下，買完用半年係唔會變做劉心悠個樣。
如果呢千幾蚊買完唔會赤赤痛，又唔阻你開飯，又可以日日用，咁先好買。
                                                                                                                                                              

(聲明: 以上產品全為自購，所有評價純粹個人感受，只供參考。產品正確使用方法及價錢以官方網站為準)