第一次。占卜。周法緣（半年後報告）

話說半年前睇開周法緣博文，
膽粗粗單人匹馬走左上去做人生第一次占卜
博文：第一次。占卜。周法緣
咁啱有留言提醒我寫返個中期報告
好～
咁啱今日早收工又心情好，最適合寫文！
　
＊＊＊＊＊＊＊＊＊＊＊＊＊＊＊＊＊

工作運：
「繼續留係度，捱下，可能要俾人屈，俾人拉落水。
　過左之後，先有機會升職。」

「唔係喎。我睇到，你之後會升得都，幾高。」
唉。咁幾時先有得升？
「過左夏天，至少過左四月先。」
「到時先考慮轉工。」

１. 咁有無俾人屈、俾人拉落水？
＞無喎？上半年大致都過得幾簡單又ＨＥＡ；係下半年多左人辭職，辛苦左咁囉～

２. 過左夏天先無升職先？
＞無升職，無加過人工

３. 咁有無轉工？
＞都無。因為成組人走剩我一個，我都唔好意思又走埋

感情運：
「邊日出世呀。」
「最快要２０１８年喎。」
下。。。咁耐。
「就算而家有得拍，都會２０１８年散。」
下。。。咁我唔拍啦。

「拿，我講你真命天子條件，你諗諗身邊有無呢Ｄ人。」
師傅講左三個條件，但身邊都無人命中。
「定係你唔知咋？無同人咁熟。」
好難問人屋企事喎。。。。。。

算啦，我都係問其他啦。反正都要散。

１. 感情如何？
＞未到２０１８年，只能說真係一。片。空。白
２. 有無遇到合乎真命天子條件的人？
＞都真係唔覺

整體運：　

師傅，２０１６年我真係好黑仔，究竟有咩方法可以改善下？
「跟住我呢三個方法，第一個就轉工見工前做，第二第三個要即刻做！」

首先，我分享呢三個方法係乜。
第一個：改頭換面
　　　　大概係改變下形象，簡單到粉底胭脂唇膏，明顯的就髮型眼鏡等
　　　　咁我就無見工，但有時真係好黑仔個陣，就即刻變一下形象。
　　　　又的確好左Ｄ！絶．對．無．講．大．話！不過有效期只係一陣～
第二個：放指定銀碼的紙幣係銀包，長期擺～
　　　　財運無特別明顯好過
第三個：放指定物件係屋企同公司
　　　　事業運同財運都無明顯好過

＊＊＊＊＊＊＊＊＊＊＊＊＊＊＊＊＊

迷之聲：咁最後，你會唔會建議人上去睇？

如果占卜半個鐘（你一定要準備好發炮式咁狂問佢），咁都幾抵睇
因為我超左時（其實都係十五分鐘），咁就貴左一倍，我就覺得唔值。

大致上，風水陣應該好快見效；如果半年後都未有咩睇頭，我會覺得無乜效囉。
至於風水佬講之前同而家的運，真係有八九成準啦。
可能都係見你問乜，咩語氣，咩衣著都估到Ｄ

未來的事，其實每一步都好影響將來
所以風水佬講將來的事，通常無咁準

迷之聲：咁你又有無後悔上左去睇？

都無既～一個好好的體驗囉～
你叫我而家再上去占卜？　我返屋企訓／出去做瑜珈好過（最近返工真心倦到不得了）
所以每一件事都需要時機配合到

最後，希望睇到尾的迷途小羔羊，如果真係好徬徨，
有餘錢不如捐出去做善事（有能力時幫助有需要的人，心情真係會好左；就算只係買簱）
或者出去做下運動／義工，釋放負能量
咁當然，你真係唔介意使少少錢，當係揾個朋友傾下計咁囉～
但千萬唔好以為睇完會發達個Ｄ

（希望周法緣粉絲睇完唔好打我呀～～～～～～～～速逃～～～～～～～～～～～～）