(例如之前整爆牙, 呢篇文到而家都一直收到EMAIL問我醫生名)
今次, 係呀, 我又出事啦
2019年, 未過半年我已經拉傷左兩次
(如果無興趣睇我受傷過程, 可以拉到最底睇 Q&A)
(照舊, 有問題email我: beautymellee@gmail.com)
(又或者最快係Facebook inbox我)
第一次拉傷：自行休養
2019年2月
上瑜珈堂時, 由於一對二, 瑜珈老師想幫我地拉深少少
個陣就係做一字馬拉得太深; "啪"一聲,
我成個跳起左!! 大腿內側痛到不得了
個刻我都未知驚, 都繼續上堂, 只係做唔到前彎
落堂個陣, 瑜珈老師只係淡淡然咁講拉傷好正常
返屋企拉下筋好快好返
可惜, 個陣我相信瑜珈老師所講自己拉下筋鬆下
大概一個禮拜, 大腿內側先無咁痛
一個月後先上到瑜珈堂
直到而家, 三個月後, 仲未做到一字馬, 拉深少少後大腿都會赤赤痛
第二次拉傷：睇醫生
2019年5月
係屋企跟住coffee youtube 練下腹肌
做做下side plank, 膊頭突然勁痛
呢次又即刻坐返起身, 諗住鬆下膊頭做下stretching應該無乜事
可惜, 到我準備訓覺就知呢次堅大獲
膊頭條筋拉傷, 扯到頸部條筋
由準備訓落床, 訓落床, 同係床想轉一下身
呢三個咁基本的動作都扯到條筋, 痛到好似條筋就黎裂開
成晚我訓到幾秒, 又痛醒, 訓下又醒下
個晚我真係諗住就死, 成晚google睇下拉傷筋會點
首先一定係discuss
1. https://www.discuss.com.hk/viewthread.php?tid=26540894
"肌肉拉傷唞咗半年都未好點算好?"
"有無e生可推介,不停拉筋無用,睇物理治療針疚又無用,網球又無用.睇過幾個醫生,個個都只比冬青膏我想有好e生,成年做五到gym,不停洗錢睇垃圾e生好痛苦求幫助"
2. https://www.discuss.com.hk/viewthread.php?tid=25734249
1. https://www.discuss.com.hk/viewthread.php?tid=26540894
"肌肉拉傷唞咗半年都未好點算好?"
"有無e生可推介,不停拉筋無用,睇物理治療針疚又無用,網球又無用.睇過幾個醫生,個個都只比冬青膏我想有好e生,成年做五到gym,不停洗錢睇垃圾e生好痛苦求幫助"
2. https://www.discuss.com.hk/viewthread.php?tid=25734249
"做gym不幸受傷"
"拉傷筋腱照MRI,你知道照一次MRI要幾錢嗎？？"
諗起呢次實手尾長, 好彩諗起有買意外保險, 又再Google
「意外受傷」的定義為純粹及直接因意外、外來、暴力及肉眼可見因素，並於身體上有明確可見瘀痕或傷口，而非任何其他原因或任何疾病、病症、身體機能逐漸退化或精神損耗引致的身體損傷。
嘩, 我睇到呢句已經心知不妙, 我做運動拉筋整傷意外保險包唔包?
驚到我臨入診所見醫生都諗住實破財, 實使幾皮野
最後, 睇完醫生, 俾左$320, 一晚好返晒
我明白當人受傷會好無安全感, 咁就算睇醫生都唔係下一秒的事,
係受傷到睇醫生之間, 總會GOOGLE睇下其他人會點處理
最記得受傷個晚係諗如果重傷就大大穫, 傷到頸唔係小事, 而且年紀大手尾長
同埋我未試過傷到訓唔到覺; 平時整傷都唔會咁
諗住上網睇下肌肉拉傷意外保險保唔保
又發覺每個人都有唔同講法, 又無人寫返事後報告
又或者個個都係求其自行搽按摩膏, 幾個月好唔返先睇醫生, 個堆人多數出晒大事
大吉利是講句, 今次好返唔知有無後遺, 但至少而家好返D, 將來後遺機會就細
肌肉拉傷 - 治療 Q&A
(以下意見只屬個人經驗, 如有問題請聯絡相關專業人士)
Q1. 肌肉拉傷之後, 應該點做?
A1. 咁都視乎拉傷得輕定重, 如果痛到影響你生活, 例如我係完全訓唔到覺, 建議立即睇醫生
Q2. 咁即時搽返muscle cooling gel/ 酸痛貼 會唔會好D?
A2. 涼一陣令你忘記痛楚, 但好快又痛返
Q3. 食得止痛藥掛?
A3. 我個陣醒唔起可以食, 醫生都問點解咁痛唔食
Q4. 咁睇中醫定西醫?
A4. 西醫, 至少即時痛症會減輕; 中醫, 例如針灸 都未必即時好得返 (大佬聽日要返工架)!
Q5. 上網見肌肉拉傷唔係咁易claim到意外保險?
A5. 無錯, 原則上只要係意外受傷保險都會包
不過同醫生講都要有技巧;
一來, 唔好話自己唔小心, 因為呢個根本係意外
(我同醫生強調我做左幾年瑜珈, 呢個係基本動作, 我都唔明點會拉傷 - 事實係咁)
第二, 同醫生講要收據用黎Claim意外保險, 聽佢講用咩字眼,
當日佢都好醒話 "sport injury", 只要收據有 accident / injury 一般都可以claim
Q6. 就算有保險, 係咪都要去左普通科先轉介專科?
A6. 絶對唔使, 直踩去專科都得; 不過我覺得首先俾家庭醫生睇睇好D
Q7. 如果食完藥都好唔返, 咁點算?
A7. 轉介去物理治療, (當然如果重要撕裂, 可能要睇骨科)
Q8. 嘩, 物理治療要做幾次喎, 條數好cum計???
A8. 意外保險包埋, 但留意係計每次意外, 我個份係每次賠USD3000,
咁每次物理治療都幾百至千幾; 照埋個MRI (如需要) 大概幾千, 都使唔晒舊錢
放心將你個人交比醫生
Q9. 醫生俾左咩藥俾你?
A9. 都係止痛藥, 按摩膏, 同埋...安眠藥
(醫生話我份人太緊張, 肌肉一直扯住先訓唔到, 唔係因為痛喎....................)
Q10. 咁你幾耐好返?
A10. 一晚
(我仲好記得醫生叫我食一晚藥, 無事就停得藥, 我"下"左聲)
Q11. 其實係咪本身唔重傷先咁易醫好?
A11. 個晚我係痛到貼近死亡, 行步路都chok到個膊頭/頸/腦 , 返工只可以睇到一個mon,
唔可以向前向後向左向右望, 行路都要勁慢; 我估算做幾傷
Q12. 點解咁易咁快好得返?
A12. 盡早求醫, 多D休息;
以我為例, 有睇醫生整傷膊頭筋位, 一日食藥搽膏好返;
大腿內側筋位係受傷三個月後都未好返, 到而家拉深少少都會一直痛落去.
我最後悔係點解當時唔睇醫生; 而家就算睇返都唔會完成康復
以我為例, 有睇醫生整傷膊頭筋位, 一日食藥搽膏好返;
大腿內側筋位係受傷三個月後都未好返, 到而家拉深少少都會一直痛落去.
我最後悔係點解當時唔睇醫生; 而家就算睇返都唔會完成康復
Q13. 最後, 點解你要寫呢篇文, 你做保險架?
A13. 就係唔係做保險, 唔熟保險, 所以先寫呢篇文, 勸大家盡快睇醫生, 減低後患.
Q14. 真係最後, 你睇邊位醫生?
A14. 照舊email, 或者最快一定係 facebook inbox我;
呢位西醫我由細睇到大, 除左傷風感冒醫得麻麻地, 其餘奇難雜症都係一兩日好返
(有2018年3月我整傷眼/ 皮膚敏感幾個月好唔返/ 返工壓力大到即場喊/ 女人病)
提返呢位醫生多人睇到不得了, 九至五以外時間, 你預等醫生一粒鐘, 等藥半粒鐘
最後最後, 希望各位身體健康!!
