購物分享。Aveda Damage Remedy [更新]

前排用完Aveda Damage Remedy hair treatment,

因為當護髮素咁日日用, 買左差唔多兩個月唔夠就用完 （超級肉赤中）

咁當然，用一次就可以拯救左我把爛髮，呢D錢係好值得使!!!

再～當然，如果隔一兩日唔用，我ｄ爛頭髮係真係會打回原狀；所以我先堅持日日用。

今次買左：

１. 右二：Aveda Damage Remedy intensive restructuring treatment 深層修護乳 （HKD 380/150ml）
　　　　　用完洗頭水後，用佢代替護髮素，同時焗佢五分鐘先洗返乾淨。

２. 左三：Aveda Damage Remedy hair repair 頭髮速效修復精華 （HKD 320/100ml）

　　　　　吹頭前或捲髮前搽少量係髮尾。

（不過呢個係第一次買，未用正式過；ＢＡ有幫我搽上頭髮試過，唔立唔油）

３. 剩底個d係sample： Smooth Infusion 系列洗頭水、護髮素及髮膜；另外有支Dry Remedy精華油.

本身諗住夾埋其他髮膜一併寫比較文，但忍唔住ｐｏｓｔ左呢篇先！

因為其中三支Sample係登入Aveda網站下載張Coupon送！當然係先到先得啦。

（http://www.aveda.com.hk/sites/default/files/file/aveda/hk/en/voucher_tc.pdf）

趁新年執返個靚頭啦喂～！！！！！

2015.2.19更新：

十分多謝網友提點，一直去開look fantastic 買野, 見住所有AVEDA產品都會寫明：

We are sorry but Aveda can only be shipped within Europe.

所以我一直以為送唔到。

尋晚試下order, 點知真係訂到, 今日都收到成功發送的EMAIL!!!!!

超級開心!!!!!!!!!!

最開心當然係真心分享，同時又有好心既網友提醒！

多謝晒BE sis!!!!!
(稍後又可以出購物分享文)

聲明 : 以上產品全為自購，所有評價純粹個人感受，只供參考。產品正確成份及買賣地點以官方網站為準。

分享。我的Jo Malone 香水系列

第一支自己俾錢買既香水品牌，就係Jo Malone；應該係三、四年前既事。

第一支買既Jo Malone香水，就係English Pear & Freesia Cologne

用左幾年，都係不斷買返呢隻味；雖然中途買過其他味。

由左邊開始數起，全部都係 30ml

１：White Jasmine & Mint Cologne
２：Blackberry & bay Cologne
３：English Pear & Freesia Cologne
４：Red Rose Cologne

賣點

Jo Malone 最吸引之處，係氣味清新，夠自然。

因為平時係其他香水專櫃行過，甚至拎Sample上手聞，都覺得俗氣/ 太有人造氣味/ 太假。所以我一直都無買開香水。

最最最最最最最最最最大賣點，當然就係將不同香水混合一齊噴，自己創造獨有的香水味！
（同時係最燒錢的一項賣點。。。。。。）


持久度
因為實際上係古龍水，持久度比一般香水低。

所以想香味留係身上耐d，職員會教你噴晒全身（真係係我面前由頭到腳係佢身上噴足Ｎ咁多下，我心諗：一蚊、兩蚊、三蚊。。。。。。。。）

慳家既我，當然就噴係衫上面啦。一下就夠！係每隻香水味一下。（笑）

咁當然，我每次都只係用兩種唔同既香水味。


我的最愛香水組合

（雖則我無用晒所有香味，但大大話話都用左五、六隻味，都有少少咁多資格分享下既。）

第一位：English Pear & Freesia　Ｘ　Nectarine Blossom & Honey
　　　　English Pear & Freesia 係中度甜又少少清新的果香味，可以中和Nectarine Blossom & Honey超甜果香味。

第二位：Red Rose　Ｘ　Orange Blossom
　　　　兩隻都係花香，但真係好夾！！！！
　　　　因為淨用 Red Rose會太有女人味，但加少少清新的Orange Blossom又係中和返少少。

第三位：English Pear & Freesia　Ｘ　Blackberry & bay
　　　　最近超級無敵最愛組合
　　　　其實因為我太愛 English Pear & Freesia隻味！！！！！！
　　　　Blackberry & bay係用開SAMPLE愛上左；呢隻味無想像中咁甜，同時有少少中性味道。




細細聲講。。。。

本身去開連卡佛買，但，你知連卡佛已經變左做內地人商場。
試過企左係度勁耐都未有Staff得閒睬你 / 遠望已經見到成堆人....

最後，轉場！！！金鐘專櫃！！！！

少人去之餘，Staff都係超級有耐性又nice！！最重要係送SAMPLE送得非常鬆！！！

呢次，我就收到。。。。。。Wood Sage & Salt Body Creme

（繼續再細細聲講。。。。
　最記得有次係連卡佛買完香水，連細支SAMPLE仔都無........OK, 免費野唔應該貪。
    但，有時吸引我下次再去返買香水，都係因為用慣左支SAMPLE先入貨!!!
    買野送SAMPLE都係宣傳之一，好不好？）

      

果然係貴價body cream！！！潤而不立，好快吸收晒之餘，仲有一陣香水味！！！！

不過，味道同本身支裝香水有少少分別。而且，香味係超級唔持久！

當然，如果我有多餘錢，都會考慮買既。。。。始終，Body Lotion係消耗品，無可能咁燒錢架？


聲明 : 以上產品全為自購，所有評價純粹個人感受，只供參考。產品正確成份及買賣地點以官方網站為準。

由頭到腳。冬季保養。

轉季，鼻敏感發作。皮膚由好乾變到勁。甩。皮。

最治本當然醫好鼻敏感先。

之後就係持久戰－－加強保濕！！

頭髮。保養

1. 護髮。Aveda Damage Remedy 深層修護乳 (購自專門店, HKD 380)
   
   

   質地：香香地，同平時用開的護髮素差唔多杰身。
   
   效果：洗完頭，搽係頭髮敷足十分鐘，簡直同出面做焗油一模一樣！！！　　　
             用左一次，由乾旱的雜草變成勁柔順，貼服左勁多（即係少左好多天線

2. ！）　　　
             不過開叉情況係改善唔到；髮尾仍然好旱都成PAT草咁，但整體好滿意呀
   
   回購：當頭髮去到勁爛勁旱先捨得買；因為超級貴！外國網而家唔送AVEDA，唉。

身體。保養

1. 全身保養。NIVEA INTENSIVE BODY LOTION深層潤膚乳液 (購自萬寧, 約HKD 5X)
   
   

   質地：爽身得黎夠滋潤，最緊要唔立！！
   
   效果：冬天用呢款，搽完一至兩個鐘，手腳都仲保持濕潤；
   　　　之前用NIVEA美白乳液，搽完一個鐘唔夠又要再補搽。

2. 回購：之前用細支試用裝，而家已經回購大支裝版。

面部。保養

1. 爽膚水。Dr. Wu 玻尿酸保濕化妝水 (購自萬寧, 約HKD 2XX)

        
   質地：比一般用開的ＴＯＮＥＲ杰身，似足開稀左的B5 GEL。
   　　　夏天用佢係立到爆炸！！！！但！！係！！！冬天用就啱啱好。
   
   效果：雖然好杰，但唔會被化妝球吸收晒，抹返上面係完全做到潔面同埋保濕的效果。
   
   回購：冬天用真係十級驚喜！
          

2. 精華。Cellbone Hydra B5+  Skin Hydration Gel  (購自萬寧, 約HKD 330)
           
   

   質地：杰身。用兩滴就搽勻全面。
   
   效果：推開搽上面，唔使５秒，塊面會乾爽晒（即刻比皮膚吸收左），絶對唔會立。　　（之前用過Dr. Wu保濕精華，搽上面後，塊面會有少少立痴痴；對手仲立，一定要洗返手）
   
   回購：上年冬天都係用佢。安穏過度。
              

3. 面霜。Olay Aquaction保濕凝露 (購自萬寧, 約HKD 8X)
        
   

   質地：有陣香味。感覺好似啫喱。
   
   效果：極普通的保濕GEL。又係上左手/ 面會立痴痴，似有層吸收唔到的野係度。
   
   回購：第二盒啦。
   　　　（喂！你又話立又香，做乜仲用？）　　
              個人極度鍾意GEL狀保濕，只要唔敏感又平，就可以長期用。
   　　　＊同類型。 Neutrogena保濕GEL，感覺到係有酒精，香料比OLAY更重；
   　　　呢種雖然平，但唔可以長期用。
   　　　＊同類型。專櫃品牌CLINIQUE MOISTURE SURGE ，無酒精無香料，
   　　　但太貴；一盒三百幾蚊用到一個月，長期用就唔化算。）
               

4. 潤唇膏。FRESH Sugar Lip Treatment Therapy (親戚送)

   
   質地：比平時用開FRESH潤唇膏更潤。
   
   效果：之前乾到連個咀都甩晒皮，要用呢隻ADVANCED版先可以救返個咀一命！！
   
   回購：潤到只可以冬天用；如果冬天用晒又勁甩皮先買，因為太貴。
                 

5. 面膜。森田高純度玻尿酸面膜 (購自萬寧, $38 盒)
                 

   質地：保濕得黎唔會太立。面膜紙係夠軟，設計好貼面。
   
   效果：敷足十五分鐘，皮膚超。級。水。潤。

6. 
   回購：買左N咁多盒。未有一隻MASK可以代替佢。
   　　　（之前已經講過，簡直係佢忠實FANS!!!!但森田其他系列面膜係極度唔好用)

後話：
睇完成篇保養文，發覺大部份保養品都係萬寧買。哈哈哈。

始終某部份保養品係長期消耗，用得貴會好肉赤呀！！！！！聲明 : 以上產品全為自購，所有評價純粹個人感受，只供參考。產品正確成份及買賣地點以官方網站為準。

２０１５年轉季底妝分享。雪花秀 BB Cushion

最近香港天氣又凍又乾，無論點敷ｍａｓｋ都唔夠保濕，一上粉無耐好快就浮粉；

而且朝早想訓耐ｄ（因為實在太凍啦！！！！），最後決定轉用ｂｂ　ｃｕｓｈｉｏｎ。

雪花秀 BB Cushion

                                         

用左一個月左右，粉撲都黃黃地

價錢
約$430
（香港專櫃購買，包一個補充裝）
（ｏｋ，我知我買貴左啦！下次我會去豬ｍａｒｋｅｔ買）

色號
No.21 Medium Pink

（參考：NARS tinted moisturizer 我用LIGHT 1 ）
（因為用左一個月，中間明顯無晒粉底液；側邊仲有好多好多好多。。。）

上手示範

未上ｂｂ　ｃｕｓｈｉｏｎ前：

超級乾的手；紋路十分顯著

每次上粉都係印少少粉底拍上面，以下分量可拍四分一塊面啦！
                   

上ｂｂ　ｃｕｓｈｉｏｎ後（只上手背左邊）：

左邊明顯有潤澤感，肉眼望有少少油立立；
右邊繼續係乾爭爭。。。。。

             
上左一層碎粉後：

（用ｒｉｍｍｅｌ　ｓｔａｙ　ｍａｔｔ碎粉（透明色））

左手背明顯無咁油立立，仲有光澤感（不過肉眼睇都仲覺得有ｄ油立立，但摸上手係絶對唔立）；
再隔多陣，個底妝會有自然光澤、明亮感。

感想

１. 超快上完妝!!! 朝早起身，兩分鐘內一定拍完全面!!!

２. 一個地方拍一至兩下就夠!!! 第一次用拍左幾次，個妝厚到成個面具咁（即刻用紙巾狂印乾）

３. 中度遮瑕。一層已經遮到毛孔、五成既千年黑眼圈。

４. 拍完ｂｂ　ｃｕｓｈｉｏｎ後會較白；之!!!但!!!係!!!，一個鐘內會暗返ｄ，隻色就啱啱好！

５. 一定要上碎粉，因為太潤，塊面好立痴痴；所以，光澤感會低左少少。

６. 用左一個月，（唔計因為前排去日本乾到爆暗瘡），基本上唔會潤到狂出暗瘡！

７. 護膚程序不變下，化妝當日：
　　鼻位側邊、額頭會少量出油（本人屬混合性乾肌）、
　　無浮粉（最感動既效果）、
　　妝感持久約四至五小時（對比我平時用ｂｂ　ｃｒｅａｍ算持久好多）

８.有一陣中藥藥材味，上面後好快揮發呢陣味。
　　

聲明 : 以上產品全為自購，所有評價純粹個人感受，只供參考。產品正確成份及買賣地點以官方網站為準。

網購分享。Look Fantastic。

網購分享。Look Fantastic。

第一次係Look Fantastic買野

網上research 過，呢個網最快可以幾日內收到貨，慢則一個月（極度不安）。

所以呢次就小試牛刀買左兩樣平野。

Look Fantastic 之疑問
Q1：呢個網站賣既野係最平最抵？
A1：某部份抵買；有ｄ公價產品，例如呢次買Tangle Teezer，15%off 折扣係用唔到。

Q2：網上訂購要幾耐先送到香港？
A2：１月２５日網上落單，２月７日就收到貨；兩個星期內送貨到香港。

Q3：有咩要注意？
A3：唔係所有產品都送到香港，例如 Benefit, Aveda, Moroccanoil 都係唔送去香港。

Q4：有無貨單號碼可以追蹤訂單運到去邊？
A4：係無既!!!!! （再次極度不安）。普通訂單只跟平郵，如果買得太貴又唔落掛號，都幾驚。


聲明 : 以上產品全為自購，所有評價純粹個人感受，只供參考。產品正確成份及買賣地點以官方網站為準。